மேற்கு வங்க சட்டமன்றத்தில் குடியுரிமை சட்ட திருத்தத்திற்கு எதிரான தீர்மானம் நிறைவேற்றம்

'மேற்கு வங்கத்தில், சி.ஏ.ஏ., என்.ஆர்.சி., (தேசிய குடிமக்கள் பதிவேடு), என்.பி.ஆர். (தேசிய மக்கள் தொகை பதிவேடு) ஆகியவற்றை அனுமதிக்க மாட்டோம்' என்று மேற்கு வங்க முதல்வர் மம்தா பானர்ஜி கூறியுள்ளார்.

Kolkata: 

குடியுரிமை சட்ட திருத்தத்திற்கு எதிரான தீர்மானம் மேற்கு வங்க சட்டமன்றத்தில் நிறைவேற்றப்பட்டுள்ளது. இதற்கு நன்றி தெரிவித்து பேசிய முதல்வர் மம்தா பானர்ஜி, 'சிறுபான்மை மக்களுக்கு மட்டுமல்ல, குடியுரிமை சட்ட திருத்த போராட்டங்களை முன்னின்று நடத்திய இந்து சகோதரர்களுக்கும் நன்றி தெரிவித்துக் கொள்கிறேன்' என்று கூறியுள்ளார். 

குடியுரிமை சட்ட திருத்தத்திற்கு எதிரான இடதுசாரிகள் ஆளும் கேரளா, காங்கிரஸ் ஆளும் பஞ்சாப் மற்றும் ராஜஸ்தான் மாநிலங்களில் நிறைவேற்றப்பட்டுள்ளன. 

தீர்மானம் குறித்த மம்தா பானர்ஜி கூறியதாவது-

மேற்கு வங்கத்தில் குடியுரிமை சட்ட திருத்தம், என்.ஆர்.சி. எனப்படும் தேசிய குடிமக்கள் பதிவேடு, என்.பி.ஆர் எனப்படும் தேசிய மக்கள் தொகை பதிவேடு உள்ளிட்டவற்றை அனுமதிக்க மாட்டோம். எங்களது போராட்டம் அமைதியான முறையில் இருக்கும். குடியுரிமை சட்டதிருத்தப்படி வெளிநாட்டவரை இந்திய குடிமக்களாக மாற்றிக் கொள்ளலாம். இதுமோசமான விளையாட்டு. நம்மை அழிவுக்கு கொண்டு செல்லும் வழி இது. இந்த சூழ்ச்சியில் யாரும் சிக்க வேண்டாம். 

சந்தேகப்படும்படியான குடிமகன்கள், அகதிகள் முகாம் இவையெல்லாம் ஏற்றுக் கொள்ள முடியாதவை. இதற்கு பிறக்காமலேயே இருந்திருக்கலாம் என்று இவை சொல்ல வைக்கும். இன்றைக்கு மக்கள் தாங்கள் இந்த நாட்டை விட்டு  வெளியேற்றப்படுவோமோ என்ற அச்சத்தில் உள்ளனர். அனைத்து விதமான அடையாள அட்டைகளை பெறுவதற்கு அவர்கள் வரிசையில் நிற்கின்றனர். 

பாகிஸ்தானின் விளம்பரத் தூதராக பாஜக செயல்பட்டு வருகிறது. எப்போது பார்த்தாலும் அவர்கள் பாகிஸ்தானை மட்டுமே பேசுகிறார்கள். இந்தியாவைப் பற்றி அவர்கள் பேசுவது கிடையாது. 

இவ்வாறு அவர் பேசினார்.